L'anuncia, por más esperada que fuera, nun deixa de ser un duru golpe: El Conceyu de Llión suspende tódolos actos de San Froilán. Una midida tan doliosa cumo sensata pa contribuir a amenorgar el triste aumentu de contaxos por COVID-19 que se diou nos últimos días na provincia.
|
Onque podía ser previsible, los llionéses garrábamonos con optimismu a la posibilidá de que finalmente la nuesa fiesta más esperada y tradicional pudiera llevase a cabu onque fuera baixo mínimos, amenorgando y controlando'l númaru d'actividades y asistentes a las mesmas despuéis de que'l propiu alcalde de la ciudá mostrara esi afán apoucayá, mas nun pudo ser. Y ye que perdemos demasiadas cousas que convertían a Llión nestos días nun auténticu formigueiru de xente: el tradicional Desfile de Pondones y Carros Engalanaos polas calles de la nuesa ciudá, la histórica Ceremonia de las Cantaderas, el visitadísimu Mercáu de las Trés Culturas, un Festival Celta Internacional Reinu de Llión no que cada añu nos deleitamos tanto con grupos ya consagraos cumo con aquellas novedades que vienen pegando bien fuerte nesti xéneru musical ou l'incesante son de música tradicional (gaita, dulzaina, pandereta, tambor…) por cada requeixu de l'antigua Legio VII. Pero echaremos en falta sobremanera la visita de toda esa xente de fuera de la nuesa provincia que chega nestos días cono sou contaxosu entusiasmu tanto pa engayolase cona ufierta cultural y gastronómica cumo pa recordanos lo arguyosos qu'hemos estar de pertenecer a esta tierra.
| Banda de Gaitas Ciudá de Llión actuando en San Froilán |
En definitiva, que nos amuela muito que si sos de fuera nun puedas venir a venos y celebrar con nós estos días tan prestosos, pero ello nun significa que nun podamos achegate todu'l sabor d'estos días a la tua casa dende la nuesa tienda online. Nella podrás adquirir todos y cadagunu de los manxares más característicos d'estas fechas. Y ye que ¿a qué sabe Llión en San Froilán? Llión sabe a morciella, a chourizo frescu cocíu ou a la plancha, a pratos chenos d'embutíu au nun falta la cecina, el xamón, el queiso, el llombu, el chourizu ou'l salchichón. Un estoupíu de sensaciones no paladar que nun deixan de ser outru de los puntos fuertes polos que Llión se chena de visitantes nestos días.
| La morciella de Llión, pratu estrella nas fiestas de San Froilán. |
Cruciaremos los deos pa que'l próximu añu podamos volver a celebrar con normalidá las fiestas llionesas más esperadas, dica entós, cuenta con nós pa celebralas al tou xeitu, no tou llar y conos tous.
No hay comentarios:
Publicar un comentario